Kəramət Böyükçölün atası: “Psixi xəstəliyi olan şəxsləri dövlət müalicə edib, bu xəstəlikdən xilas etməlidir”

“Mənə elə gəlir ki, bu cür məsələlərdə bir az şişirtmə olur. Həm informasiya, həm sosial şəbəkə, həm də reklam oyunu baş verir”

Pravda.az-ın xəbərinə görə, bunu Azərbaycan Yazıçılar Birliyinin uşaq Ədəbiyyatı şöbəsinin rəhbəri, şair Qəşəm Nəcəfzadə cəmiyyətdə uşaqlarla bağlı baş verən hadisələr haqda danışarkən deyib. Onun sözlərinə görə bəzən uşaqlar da yalandan danışaraq hadisələrin qızışmasına səbəb olur:

“İnsan olan kəs uşağına işgəncə verməz. Mənə elə gəlir ki, bu cür məsələlərdə bir az şişirtmə olur. Həm informasiya, həm sosial şəbəkə, həm də reklam oyunu baş verir. Yazılara elə başlıqlar qoyurlar ki, adam dəhşətə gəlir və baxırsan ki, deyilən şeydən orda xəbər-ətər yoxdur. Bir dəfə ATV-də Zaur Baxşəliyevin verilişinə dəvət olunmuşdum və aparıcı dedi ki, “Diqqət! indi verilişə bir uşaq daxil olur, qardaşları onu küçədə diləndirir, onu evdən qovublar”. Uşaq verilişə daxil olandan sonra bütün ekspertlər düşdü uşağın üstünə və tələb etdilər ki, bunun müəllimi, qardaşı, qohumları hardadır? Dedim ki, oğlum, sən yalan danışırsan, səni diləndirmirlər. Adını soruşdum bir ad dedi və dedim ki, bu sənin adın deyil, əsl adını de, əsl adını da dedi. Dedim ki, səni diləndirmirlər, özün məktəbdən qaçırsan, özünü bununla xilas etmək istəyirsən, guya ki, səni incidirlər. Bəzən uşaq da ifa edir, sosial bir oyun-oynayır. Bu zaman uşağın qardaşı efirə zəng vurub dedi ki, “Qəşəm müəllim, mən sizə təşəkkür edirəm, həqiqəti siz dediniz. Bu uşaq evdən qaçır, bizim sözümüzə baxmır”. Bu dəfə həmin ekpsertlər uşağın üstünə düşdülər və başladılar ki, sən niyə belə edirsən?”. Mənə elə gəlir ki, hər bir adamın kim olursa olsun, içində bir insanlıq var, Allah heç kimi kasıb yaratmayıb. Allah hamının içinə sevgi verib. Bəzən bu cür hadisələri şişirdirlər. Yolda gedəndə görürəm ki, insanlar nə qədər pişikləri, itləri yemləyir. Bu gün 90-95 faiz insanlar belədir və əgər bu cür şeylər varsa, baş verənlər artıq cəmiyyətin yaratdığı bir şişirtmədir. Belə hadisələrin çox şahidi olmuşam.

Bu cür hadisələr o zaman baş verə bilər ki, ata və ananın psixi pozğunluğu olsun, insan əzabından, uşağı incitməklə bundan zövq alsın. Bu isə artıq narkomaniyadır. Mənə elə gəlir ki, dövlətimiz bütün narkomanları pulsuz müalicə etdirməlidir. Bir dəfə verilişdə psixoloqla üz-üzə gəldik və xəstə, psixopat dərmanları qəbul edən adamdan söhbət gedirdi. Bildirirdilər ki, dərman almaq üçün pul tapmır, aptekin şüşəsini qırıb dərman oğurlayır. Psixoloq da deyir ki, o, gəlsin bizə müraciət etsin və biz də onu sağaldaq. Psixoloqa dedim ki, ay zalım oğlu, o, özünü əlli manatın ucbatından öldürür ki, pulu yoxdu, sizin də qəbulunuz əlli manatdı və o, sizin yanınıza necə gəlsin? Ona görə də psixi xəstəliyi olan şəxsləri dövlət müalicə edib, bu xəstəlikdən xilas etməlidir”. Moderator.az

Qeyd: Q.Nəcəfzadə qalmaqallı fikirləri ilə tanınan yazıçı Kəramət Böyükçölün atasıdır.

Tarix: 13 Dekabr 2019, 20:15

Xəbər lenti